МАСОНКИ ПРЕД СЕЛЕКТОРОМ
Соботу вечар (27.03.2004.) у просторийох Руского културно-просвитного дружтва у Новим Садзе, виведзени обидва "Масонки" нашого визначного писателя и режисера Дюри Папгаргая.
Причина же би новосадска публика знова видзела тоти монодрами у виводзеньох Ксениї Макаї Орос ("Масонка зоз Куртого шора") и Наташи Макаї Мудрох ("Масонка, а аж зоз Коцура") то, же новосадски городски одбор Рускей матки обидва тоти монодрами кандидовал за союзни фестивал монодрами у Земуну, хтори ше отримує каждого року у маю мешацу.
Понеже кажди фетивал хтори "трима до себе" ма селектора, так и тот у Земуну по истей роботи послал до Нового Саду пана Ивана Бекярева , ґлумца хторого нє треба представяц ширшому авдиториюму (медзи велїма улогама, спомнїме лєм його улогу Курчубича зоз сериї "Лєпши живот"). Иншак, пан Бекярев тиж и уметнїцки директор фестивалу монодрами у Земуну.
Як ше нашо ґлумици чувствовали пред шумним числом патрачох и пред селектором, паном Бекяревим, то лєм вони знаю. Алє, и кед же можебудз було треми, успишно ю скрили и занєдзбали, бо їх ґлума була на, насправди, високим уровню цо потвердзел и сам пан Бекярев.
По його словох, приємно бул нєсподзивани и зоз фактом же Руснаци, гоч кельо мало нас, релативно, єст, заш лєм успишно пестую єден зоз найчежших жанрох у театру, а то праве монодрама. Тиж му презентоване же маме и свой, руски, фестивал монодрами (у орґанизациї Рускей матки) и же за тогорочни фестивал хтори ше отрима у новембру мешацу (як и влонї) уж маме приявено 6-7 ориґинални монодрами.
Розуми ше же пан Бекярев мал и одредзени зауваги, насампредз по питаню мизансцени, алє то уж питанє хторе режисер муши ришиц зоз ґлумицами по отримованє фестивалу у Земуну.
Чи ше нашо ґлумици, Сенка и Наташа, найду у дружтве таких ґлумецких авторитетох як цо то Светлана Бойкович, Раде Шербеджия и други у Земуну, дознаме уж о даскельо днї, алє же руски театрални аматеризем, лєбо полу-професионализем ма красну основу и будучносц, то ше зна уж и тераз.
