ДРУГИ РУСКИ ФЕСТИВАЛ МОНОДРАМИ
У Руским културно-просвитним дружтве у Новим Садзе од 16. та по 20. новембер отримани Други руски фестивал монодрами у орґанизациї городского одбору Рускей матки. Шицких госцох и присутних привитал Ярослав Сабол, предсидатель Городского одбору Рускей матки у Новим Садзе, а Фестивал урядово отворел познати новосадски ґлумец Стеван Ґардиновачки, хтори з тей нагоди виповед єден монолоґ зоз култней представи "Святи Георгий забива шарканя". Святочносц отвераня Фестивала зоз своїм креативним шпиваньом збогацела дзивоцка шпивацка ґрупа РКПД зоз писню "Ораче, ораче".
През пейдз днї, кельо тирвал Фестивал , виведзени седем монодрами, а шейсц були у конкуренциї за награди, бо Фестивал бул змагательного характера.
Монодрама "Барон Минхаузен" Ґ. А. Бирґера, Драмского Студия "Арт" Дома култури зоз Руского Керестура, у режиї Владимира Надя Ачима, а у виводзеню Емила Нярадия, отворела Други фестивал монодрами.
Монодраму "Примакрена" написала Мария Сопка, режирал ю Владимир Надь Ачим, представа Городского одбору Рускей матки з Нового Саду, а у орґанизациї Драмского студия "Арт" Дома култури з Руского Керестура.
Другого вечара на Фестивал монодрами сцигла и "Феброн" з Коцура искусней ґлумици Аранки Медєши . Серафини Макаї написала тот текст, режисер Дюра Макаї , a монодрама виводзена у орґанизациї подружнїци Дружтва за руски язик, литературу и културу и МО Рускей матки у Коцуре.
Штварток вечар у новосадскей Матки виведзена монодрама "Ясна" хтора була приємне ошвиженє на тогорочним Фестивалє, а ґлумела ю Александра Лендєр зоз Вербасу. Режисере єй родичи , Нада и Янко, а текст написала Серафина Макаї, а бавена є у орґанизациї Културно-просвитного дружтва "Карпати" и МО Рускей матки у Вербаше.
Пияток, у виведзеню Цецилиї Мудри и режиї Владимира Надя Ачима, була виведзена "Штефания" по тексту Серафини Макаї. Орґанизатор представи були Руске културне-уметнїцке дружтво "Др Гавриїл Костелник" и МО Рускей матки зоз Кули.
Всоботу, остатнього вечара видзели зме представу "Леоново войни", автора, режиї и ґлуми Ирини Гарди-Ковачевич, а у орґанизациї Городского одбору Рускей матки у Новим Садзе.
Фестивал заварла монодрама "Цали живот склєпани " (Адаптация женских розгваркох), писатель Душко Радович, адаптация, режия и ґлума Мария Ненадич на румунским и сербским язику.
Попри одлично написаних, режираних и одґлумених монодрамох, приємне нєсподзиванє було и нєопчековано вельке число нащивительох на шицких вечарох фестивалу. То задавало слатки бриґи орґанизаторови, городскому одбору Рускей матки у Новим Садзе, бо ше случовало же нє було досц карсцелї та числена публика мушела и стац.
ОДЛУКА О НАГРАДОХ
Жири у составе: Дюра Папгаргаї, Боро Яйчанин и Юлиян Каменїцки додзелєли 3. награди и то:
Перша награда - монодрами "Леоново войни", автора, режиї и ґлуми Ирини Гарди-Ковачевич представи Городского одбору Рускей матки у Новим Садзе.
Друга награда - монодрами "Барон Минхаузен" (Ловарски приповедки), автора Ґустав Авґуст Бирґер, ґлумец Емил Няради, режия Владимир Надь Ачим, представа Дома култури, Драмского студия "Арт" зоз Руского Керестура.
Треца награда - монодрами "Ясна", автора Серафини Макаї, ґлумец Ясна Лендєр, режия Янко Лендєр, орґанизация КПД "Карпати" и Месного одбору Рускей матки у Вербаше.
