Aktuelnosti 013

Ф е с т и в а л

Од 10.-го по 13.-ти новембер 2005. року у Новим Саду, у просторийох Руского Културно Просвитного Дружтва ше, у орґанизациї новосадского городского одбору Рускей матки, отримал треци руски Фестивал монодрами. Тот Фестивал характеристични по тим же ше у конкуренциї за награди нашли шейсц монодрами наших писательох и то:

• "ИЛИЯ ОПОЗИЦИЯ" Дюри Папгаргая,

• "ВИЧНИ БРИҐИ" Серафини Макаї,

• "ПРИПОВЕДКИ ЗВИЧАЙНЕЙ ЖЕНИ" тиж Серафини Макаї,

• "ИНТЕРВЮ ЗОЗ ВАМПИРОМ" у обробки Цветина Аничича,

• "МИЛИОНЕРКА" Ирини Гарди-Ковачевич, и

• "СИЛИ И КОНЇ" Мариї Сопка

Тогорочни руски Фестивал монодрами отворел визначни режисер Воїслав Солдатович хтори уж велї роки провадзи театралну дїялносц Руснацох. Нє лєм же провадзи, алє и активно участвує у нєй, бо добре познате же пан Солдатович режирал велї представи за "Дядю". Прето, по словох пана Солдатовича, ма полне право глєдац же би бул преглашени за "гонорарного Руснака", цо у публики виволало моцни аплауз. Отвераню Фестивала присуствовали и дзепоєдни члени Националного совиту Руснацох на чолє зоз паном Славком Оросом, як и узше руководство Рускей матки. Учасц у отвераню Фестивала вжала и женска шпивацка ґрупа Руского Културно Просвитного Дружтва хтора одшпивала даскельо руски народни шпиванки.

Каждого вечара ше у просторийох РКПД-а могли одпатриц по два монодрами. Першого вечара то були "КОМУНЯРА" и "ИЛИЯ ОПОЗИЦИЯ", другого, "ИНТЕРВЮ ЗОЗ ВАМПИРОМ" и "ВИЧНИ БРИҐИ", трецого "ПРИПОВЕДКИ ЗВИЧАЙНЕЙ ЖЕНИ" и "МИЛИОНЕРКА", а остатнього, штвартого вечара публика видзела "СИЛИ И КОНЇ" и "ЖЕНИ".

У конкуренциї за награди публика видзела ґлумцох Янка Лендєра зоз Вербасу, Мирона Джуджара и Цветина Аничича зоз Шиду, Меланию Макаї зоз Коцура, Ирину Гарди-Ковачевич зоз Нового Саду и Марию Сопка зоз Руского Керестура.

З вонка конкуренциї за награди публика одпатрела два госцуюци представи. Перша монодрама, хтора и отворела тогорочни Фестивал, була "КОМУНЯРА" писателя Лазара Бояновича-Зилета хтору одбавела панї Милена Шиячки-Булатович иншак ґлумица Сербского Народного Театру зоз Нового Саду. На завераню Фестивала, публика могла одпатриц и интересантни колаж под назву "ЖЕНИ", режисера Владимира Надя-Ачима у хторим ґлумели: Нада Лендєр, Мира Антич, Ганча Чапко, Аранка Медєши, Ксения Орос-Макаї и Тереза Варґа.

Жири у составе: Амалия Хромиш, Владимир Дудаш и Владимир Новта, на тогорочним Фестивалу нємал лєгку роботу бо од шейсцох добрих монодрамох, требало вибрац лєм три. Но, жири одлучел же трецу награду освоєла монодрама "СИЛИ И КОНЇ" писательки зоз Руского Керестура Мариї Сопка хтора и виведла тоту монодраму, а у режиї Владимира Надя-Ачима. Другу награду освоєла монодрама "ИНТЕРВЮ ЗОЗ ВАМПИРОМ" хтору режирал и одбавел Цветин Аничич (на сербским язику) зоз Шиду, а як найлєпша на тогорочним Фестивалу, преглашена монодрама "ИЛИЯ ОПОЗИЦИЯ" писателя Дюри Папгаргая у режиї и виводзеню Янка Лендєра зоз Вербасу.

Того року и публика мала нагоду вибрац найлєпшу монодраму по своїм смаку, так же награду публики достала монодрама "ИЛИЯ ОПОЗИЦИЯ" . То значи же ше уметнїцки упечаток цо значне жирию поклопел зоз смаком публики.

Важне наглашиц и тото же ше з рока на рок звекшує число монодрамох у конкуренциї, як и число писательох. Тиж, замерковане же ше Срим, т.є. Шид, активно уключел до Фестивалу и то з двома монодрамами, за розлику од прешлих рокох кед нємал анї єдну. Чкода же, пре обєктивни причини, на тогорочним Фестивалу нє участвовали Суботичанє и Кулянци, гоч им наградзени тексти монодрамох були дати. Но, як уж тераз познате, Суботицу и Кулу увидзиме на Фестивалу 2006. року.

Цо ше дотика числа нащивительох, односно патрачох руского Фестивала монодрами, очиглядне же їх число з рока на рок вше векше. Гоч може спреведнуц упечаток же влонї на Фестивалу публика у велькей сали РКПД-а стала з боку, коло мурох, а того року нє, то лєм прето бо ше орґанизатор, новосадски городски одбор Рускей матки, потрудзел обезпечиц достаточне число карсцельох. Цена уходнїцох була 200,00 динари за шицки штири вечари Фестивалу (односно 50,00 динари по вечару, лєбо 25,00 динари по монодрами), а з тима уходнїцами ше гласало и за награду публики. За кажди вечар поєдинєчно, цена уходнїци була 100,00 динари, алє ше з нїма нє могло гласац за награду публики. Гоч цени уходнїцох були вецей як символични, заш лєм замерковане же ше дзепоєдни патраче (углавним члени Союза РиУ, гоч було и тих цо зачували чесц Союза та купели уходнїци), як цо народ гвари "направели шалєни", та нє купели уходнїцу. Кед же думали же зоз тим очкодую Руску матку, погришели. Поробели праве супротне.

Може ше повесц же ше шицки векши места дзе жию Руснаци уключели до руского Фестивалу монодрами. Шицки окрем Дюрдьова, гоч му новосадски городски одбор Рускей матки понукнул даскельо тексти монодрамох за виводзенє. Же Дюрдьов нє участвує на Фестивалу (окрем чесних винїмкох, як цо то панї Чапкова) нє треба анї же би чудовало. Бо, покля културну политику у Дюрдьове водзи Союз РиУ и його прихильнїки (а знаме кадзи и у хторим напряме), друге ше нє може анї обчековац, без огляду же таке справованє чкодзи найвецей праве Дюрдьову.

Такой по законченю трецого Фестивала розписани конкурс за нови тексти хтори би були виведзени на штвартим руским Фестивалу монодрами. Конкурс будзе отворени по 01. фебруар 2006. року, а спрам перших, нєофицийних, информацийох уж єст три тексти хтори би ше могли найсц у конкуренциї.

И на концу ше може повесц же треци по шоре руски Фестивал монодрами сполнєл обчекованя. Було вецей и тексти и представи и ґлумцох и патрачох. Очиглядно же поцах новосадского городского одбора Рускей матки бул праве гевто цо Руснацом требало. Полна сала зоз патрачами каждого вечара у РКПД-у то потвердзує.