Aktuelnosti 013

ОТРИМАНИ ПИЯТИ РУСКИ ФЕСТИВАЛ МОНОДРАМИ У НОВИМ САДЗЕ

Пияток, 09. новембра 2007. року на 19 годзин, почал ювилейни, пияти Руски Фестивал Монодрами у Новим Садзе. За розлику од прешлих штирох Фестивалох хтори отримани у Руским Културно Просвитним Дружтве, алє у нєадекватним просторе (понеже тото Дружтво за розлику од шицких других руских дружтвох, нєма свою позорнїцу и нє зна ше кеди и чи ю вообще и будзе мац), тот Фестивал отримани у малей сали Театра Младих у Новим Садзе, дзекуюци, першенствено, порозуменю городских власцох задлужених за културу, як и руководству того Театру.
И тот, як и прешли штири Фестивали успишно орґанизовал городски одбор Рускей матки у Новим Садзе, алє того року зоз полну помоцу и потримовку новоформованого "МАТКА-Дружтво Руснацох Нового Саду-Войводина".
На тогорочни Руски Фестивал Монодрами сцигло аж 12 тексти монодрами, а за виводзенє, после селекциї фаховей комисиї, успишно пририхтани 5 монодрами. Так же ювилейни, пияти Руски Фестивал Монодрами отворени зоз виступом новоформованого мишаного хору новосадскей греко-католїцкей церкви св. апостолох Петра и Павла и Руского Културно Просвитного Дружтва, а официйно, Фестивал отворел и госцох привитал предсидатель городского одбору Рускей матки у Новим Садзе и предсидатель Дружтва "Матка", Ярослав Сабол.

Першого вечара, новосадска публика мала нагоду як першу, видзиц монодраму "Барон Минхаузен-война зоз Турками и путованє на Мешац" А. Ґ. Бирґера, у виводзеню єдного од най'успишнєйших руских ґлумцох штреднєй ґенерациї, Емила Нярадия (зоз Руского Керестура), а у режиї Владимира Надя-Ачима. Моцни аплауз театрално образованей и вимагательней новосадскей публики и з тей нагоди потвердзел високи реноме Нярадийовей ґлумецкей схопносци.
После "Минхаузена" и Нярадия свойо ґлумецки способносци на найлєпши можлїви способ указал Игор Ґрекса зоз Шиду, у монодрами "Ґеоґрафия Сербиї". Убавени и ошведочено успишни тандем Цветин Аничич (з тей нагоди адаптация и режия) и Игор Ґрекса (ґлума) и на тогорочним Фестивалу публики пририхтал нєзабудлїве театралне дожице. През трансформацию даскелїх особох тандем Аничич-Ґрекса спатрел терашню реалну слику велького примитивизму у Сербиї од хторого нє мож сцекнуц бо и саме дружтво, прейґ рижних медийох, тому доприноши.

Другого вечара Фестивалу публики у Театре Младих ше представела госцинска Фестивалу наша руска, млада, алє уж позната и афирмована ґлумица, Даниєла Штайнфелд зоз Руского Керестура, иншак професийна ґлумица Драмского театру у Беоґраду (дакедишнї "Югославянски Драмски Театер"). Вона новосадскей публики виведла даскельо сонґи зоз познатих мюзиклох.
Монодрама "У подпису Вирджиния Вулф" пришла на руски Фестивал зоз Сримскей Митровици дзе ше после 50 рокох ознова основал руски театер, розвива руска театрална дїялносц и знова ґлуми по руски. Чесц рускому Фестивалу дали Єлена Янкович хтора тоту монодраму одбавела и Оливера Єжина хтора тоту монодраму режирала, бо гоч Єлена Янкович нє Рускиня, вона текст монодрами виведла по руски, а дзекуюци прекладу Михайла Зозуляка. Чежку психодраму о остатнїх хвилькох живота познатей писательки Вирджиниї Вулф, Янковичова одбавела одлично цо ше од професийней ґлумици и обчековало.

Треци и остатнї вечар Руского Фестивалу Монодрами, одпочал зоз монодраму "Тварде слово" писательки Мариї Сопковей, у режиї Михайла Зозуляка, а у одличним виводзеню Меланиї Арваї, дебитантки у театралних, ґлумецких водох, зоз Кули. Реалистични приказ хвилькох, гумористичних и гевтих цо су то нє, а од хторих ше состої живот, Сопкова пластично презентовала новосадскей публики за цо була наградзована зоз моцним и частим аплаузом.
Як пияту и остатню монодраму на тим ювилейним Фестивалу, публики презентована "порусначена" Босанка, односно монодрама под назву "Мено ми Андя, а зову ме Ханча", писательки Серафини Медєшовей, у режиї Дюри Макая, а у маестралним виводзеню Аранки Медєшовей зоз Коцура. Од початку та по конєц монодрами, Медєшова нєпреривно тримала увагу публики. През (дакеди и чарни) хумор виприповедана животна приповедка єдней Босанки хтора, понеже ше одала за Руснака, научела бешедовац по руски, научела вариц руски єдзеня, научела руски звичаї и обичаї, та научела и вожиц бициґлу. Понеже робела у школи зоз панами (як пораячка) мушела научиц аж и циґаретли куриц. Медєшова и у тей монодрами ище раз указала и потвердзела свой розкошни ґлумецки талант.
Учасц у остатнїм вечару Фестивала як и у його завераню 11.новембра 2007. р., вжала женска жридлова шпивацка ґрупа КПД "Дюра Киш" зоз Шиду, хтора одшпивала даскельо руски народни жридлово шпиванки. Фестивал официйно завар предсидатель городского одбору Рускей матки у Новим Садзе и предсидатель Дружтва "Матка", Ярослав Сабол, а зоз поволанку за шести Руски Фестивал Монодрами у Новим Садзе, 2008. року.

Руски Фестивал Монодрами у Новим Садзе, од свойого постаня, та так и тот пияти, бул змагательного характеру, а жири була публика у сали хтора на окремних лїсткох гласала за, по єй думаню и смаку, найлєпшу монодраму спомедзи пейц виведзених.
Спрам гласох публики, монодрами наградзени так:

першопласована: "Мено ми Андя, а зову ме Ханча", у виводзеню Аранки Медєшовей зоз Коцура, писательки Серафини Медєшовей, а у режиї Дюри Макая;
другопласована: "Ґеоґрафия Сербиї", у виводзеню Игора Ґрекси зоз Шиду, а адаптация и режия Цветин Аничич;
трецепласована: "Тварде слово", у виводзеню Меланиї Арваї зоз Кули, писательки Мариї Сопковей, и у режиї Михайла Зозуляка.

Як и потерашнїх рокох, награди були финансийни (12, 10 и 8 тисячи динари), а як памятку на участвованє на тогорочним Фестивалу, учашнїки достали репродукцию малюнку "Рускиня у желєним" (олєй на платну, Шид, 1935.р.) Сави Шумановича, дзекуюци вецей рочному успишному сотруднїцтву помедзи городским одбором Рускей матки у Новим Садзе и Музейом Сави Шумановича у Шиду. Того року репродукция малюнку подарована и Националному совиту Руснацох за вецейрочне сотруднїцтво, а дарунок превжал предсидатель Националного совиту, Славко Орос.

Тогорочни ювилейни, пияти по шоре Фестивал, новосадскей публики представел пейц монодрами високого текстуалного, ґлумецкого и режисерского уровню. Гевто цо мож зоз сиґурносцу повесц то тото же, без огляду на шицки почежкосци хтори Фестивал провадзели од самого початку, та и подшмихи и явне знєважованє тей манифестациї и то праве з боку гевтих хтори би по своєй (наводней) вокациї роботнїкох у култури при Руснацох перши мушели прилапиц, защициц и реализовац идею хтору скорей 5 роки до явносци винєсол городски одбор Рускей матки, тот Фестивал превозишол и тоти дробни души, уско руски рамики та и сам себе. Нїяким концом ше нє шме забуц же док ткв. "защитнїки" рускей култури и "руски културни роботнїки" нїч нє робя, алє лєм "зогриваю фотелї" на хтори нє буду ище длуго шедзиц, дотля гевти, хтори були наволани "анонимусами" з боку тих и таких "роботнїкох", винєсли на своїх плєцох єдну манифестацию хтора позната и призната нє лєм на уровню Нового Саду, Покраїни и Републики, алє и дакус ширше.